Compilatiecorpus Historisch Nederlands 1.0 (CHN): ambtelijke teksten 1250-1800: brugge_1270_7

<begin>
Johan van snipgate & willem die corte tierin van score Johan die weuel woutra johans akets zoene reinuard porin & oliuir vander haghe wie scepene vanden vrien doen te uerstane allen den goenen die dese lettren sullen horen & zien
</begin>
<main>
dat camen voer ons leden moenekin puddin & marote zijn wijf & boetsoete sijn moeder das voergheseits moenekins puddins & gauen vp te wetteliker ghifte willemanne den makelare & katerinen sinen wiue iii ymete lands lichtelijc min jof me & leghet jnt ambocht van ghistele & iiij linen van desen lande zo leghets jnden polre vp puddins wech & ij linen & xviii Roeden zo leghets jn arnouds poters hoeft stic & i 1/2 linen & xii Roeden zo leghets jn arse belec & j line & vi Roeden zo leghets jn bertsoete puddins ofstede & dit land vri quite land & heighin land & wech te dien lande vp varende & of varende & waer dat zake dat hem van desen lande iet gebrake zo heuet hem ghewedt pieter Reifin f Johans Reifins dit land te wlcomene Vort zo comt dese voerseide willeman & gheuet desen voerseiden moenekine puddine dit land weder therueliken scense omme xxv s iaers & desen scens te gheldene sente johans messe & sente bamesse & dit land ghelt coep & versteruenesse dat zijn viere capoene
</main>
<end>
Dese ghifte van desen lande was vp ghegeuen sente katerinen daghe Dit was jnt iaer ons heren als men scrijft zijn jncarnatioen MCClxx
</end>