Compilatiecorpus Historisch Nederlands 1.0 (CHN): ambtelijke teksten 1250-1800: brugge_1271_1

<begin>
min here boudene die broekre ruddre & johan die grote & diederic vos & reinuart porin & johan van laepscuere & clais filius domini hughes & reinuart filius godelinden scepen van den vrien doen te verstane allen den gonen die dese lettren sullen horen & sien
</begin>
<main>
dat cam vor onsleden daniel robe & heilsote sin wijf & gauen vp te wetteliker ghifte lammine van der mere iii 1/2 himete lants lichtelic min jof lichtelic me ligghende jnt ambocht van metkerca dar daniel robe vp wont & sin wijf & van dien lande so warens die ij himete daniels moyen & dit vri lant & heghin lant & quite lant & wegh te dien lande vp varende & of varende & dit lant so hebben si hem ghewet wel & wettelike te ghewarne jeghen helken mensche vort so comt dese vorseide lammin van der mere & heilsote sin wijf ende gheuen dit vorseide lant weder vp desen vorseiden danele roeben te erueliken sense omme xl sol jars & coep & versteruenesse & dese sens van desen lande te gheldene die hene helt te helker sinte kerstoffersmesse & die andre helt te helker sinte bamesse Dese ghifte van desen lande was vp ghegheven vrindaghes vor sincsen
</main>
<end>
dit was jnt jar ons heren als men scrift sin incarnation m cc lxx primo
</end>