Compilatiecorpus Historisch Nederlands 1.0 (CHN): ambtelijke teksten 1250-1800: brugge_1271_4

<begin>
Min here wouterman van ghent ruddere diederic damhoudre henric uan heesne willem f ser willems hughe stroekin f ser dedrix oliuier uan der haghe ende jan haket wi urie scepene van brugs ambocht doen te uerstane al den ghenen die dese letteren sullen zien ende horen
</begin>
<main>
dat quam vor ons dancs ende willende hannin f ogiuen ende gaf wettelike ghifte jacop f pieters portere uan brughe ende auesoeten sinen uuiue uan uirdalf linen lands lettel min of lettel meer lighende binder prochie uan leffinghe daer dies uorseids hannes huus vp staet ende ghelouede wech ende land vri eghin ende quite te wette te waerne ieghen elken mensche doe quam die vorseide iacop ende auesoete siin wiif ende gauen weder dat vorseide land dien vorseiden hannine te heruelike chense omme tiene sol ulaemsche elcs iaers te gheldene diene helt te sinte ians messe ende dander helt te sinte bamesse der naer uort quamen vor ons weitin f maben dies hannins suaselinc ende katerine siin wiif ende gauen wettelike ghifte dien vorseiden iacoppe ende auesoeten uan uirdalf linen lands lettel min of lettel meer lighende an dander uirdalf linen lands vorseid ende hetet al te gadere dese seuene linen de huusmaet ende sij ghelouendens hem te waerne vrieghin ende quite land te wllen eghidome ieghen elken mensche doe gauen die vorseide jacop ende auesoete dien vorseiden weitine ende katerinen dat vorseide lant te heruelike chense om tiene sol vlaemsche elcs jars te gheldene dene helt oec te sinte jans messe ende dander helt te sinte bamesse dar naer comt vort quam jan roelin ende ghelouede dien vorseiden jacop ende auesoeten dat land bedesen vri eghin ende quite ieghen elken te wette te waerne te wllen eghidoeme
</main>
<end>
ende om dat wi vorseide scepenen willen dat dit bliue uast ende ghestade soe hebbe wi dese letteren gheseghelt met onsen seglen dit was ghedaen te brughe in die uirscarne saterdaghe nader triniteit in jar ons heren als men scref siin incarnatioen m cc lxxj
</end>