Compilatiecorpus Historisch Nederlands 1.0 (CHN): ambtelijke teksten 1250-1800: brugge_1271_6

<begin>
Mijn here roger van ghistele ruddre johan van snepgate domaes de hont johan de weuel bouden dyserine stasin tolnare ende bouden van scarpinge schepenen van den vrien doen te verstane alle den gonen die dese lettre sullen sien ende horen
</begin>
<main>
dat quamen vor ons hars danx ende hars willen willem carpentier portre jn brucge ende marie sijn wijf ende verlieden vor ons dat si vercocht hadden den here michiele prochipape van sint saluators viertich sceleghe renten siaers met wllen cope alst gheualt ende versterfnessen die hem was sculdich iaerlix weitin van colewerue ende pieter sijn broeder te gheldene die ene helt te sinte baues messe ende dandere helt te sinte marie lichtmesse vp viue ymete lands die heten snellenghers stic rikerstic ende strinc liggende jnt ambocht ende jn die prochie van meetkerke ende gauens hem wettelike ghifte ende halmets hem ende weddent hem te warne vri ende quite ieghen elken mensche na der wet van den vrien
</main>
<end>
ende om dat wie vorseide scepenen hier ouer stonden so hebben wie dese lettre ghezeghelt met onsen zeghele Dit was ghedaen jnt raet huus jn de borgh saterdaechs vor sinte johans messe midzomers jnt iaer ons heren als men scrijft sijn jncarnation mcclxxj
</end>