Compilatiecorpus Historisch Nederlands 1.0 (CHN): ambtelijke teksten 1250-1800: brugge_1271_9

<begin>
Mijn here boudene reyfin mijn here boudene broekra rudders boudene van scarpinghe jhan van kleyheem reinvard f ghodelieue thiedric die vos willem die corte ende thomaes die hont schepenen vanden vrien Doen te verstane alden goenen die dese lettren sullen horen e
ende zien
</begin>
<main>
Dat cam vore ons heinekin f agheten ende juliana sijn wijf weitins dochter blocs ende gauen te wetliker ghifte celien f jhans witten tue jmete lands lichtlic min jof meer ligghende jn serwoutermans ambocht besude boenheem twilke lant heet die hils daer dese vorseide tue jmete lands jn ligghen die ligghen of oesthalf andie grote hils ende of nordhalf an vrowine maed ende of suydhalf ant belecsin ende of westhalf andie hillekine ende si wedden hare dat vorseide lant te wetten te ghewarne wech ende lant ende quite lant te haren vrien eghinedoeme jeghen elken mensche Ende die vorseide celia f jhans witten gaf weder dien vorseiden heinekine f agheten ende julianen sinen wive dat vorseide lant te arfliken cense omme tuyntich scheleghe tsiars goeder vlaemscher peneghe ende enen capoen jof tuelef peneghe vlaems over die warde dat lant al Ende dien cens te gheldene elkes jaers te sinte baues messe ende wllen coep ende wlle versteerfnesse
</main>
<end>
ende omme dat wie schepenen vorseid willen dat dese dinc si vast ende ghestade so hebben wi dese lettren gheseghelt te kennessen met onsen seghelen vthanghende Dit was ghedaen saterdaghes vore sinte clements daghe jnt jaer ons heren alseme scriuet deincarnation m cc lxxi
</end>