Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_1

<begin>
Mijn here riquard van straten ruddra Riquard dininc thirin van score jhan aket lambrat van zeidelghem heinric van esene hughe strokin wie scepene van den vrien doen te wetene allen den ghoenen die dese lettren sullen zien of horen lesen
</begin>
<main>
dat camen voer ons gherard die goes ende clementie sijn wijf ende ghauen wettelike ghifte den here jacobe van oudenburgh caplaen van sinte doenaes jn brugghe van i 1/2 ymete ende v 1/2 haste lands lichtelic min of lichtelic meer dat si hem vercochten ligghende jnt ambocht ende jn die prochie van ghistele ende dit land heet weldijc ende het leghet noerd van ghistele ouer die zilinghe oestouer bi tsheren lande van ghistele ende dit land heuet hanne pulkerdul te cense omme xxxvi sol ende iiij 1/2 d elcs jaers te gheldene dene helt te sinte jhans messe ende die andere helt te sinte baues messe ende dese chens sal ghedueren tote zeuen jaren Voert so ghauen dese voerseide gherard die goes ende clementie sijn wijf den voerseiden here jacobe van oudenburgh wettelike ghifte van i 1/2 ymete ende xiij haste lands lichtelic min of lichtelic meer dat sie hem vercochten ligghende jnt ambocht ende in die prochie van ghistele ende dit lant heet jdselieue hoec ende het leghet bi desen voerseiden lande an die oestside ende dit land heuet lammekin heinrics boids zoene te chense omme xxxj sol j d min elkes jaers te gheldene die ene helt te sinte jhans messe ende die andere helt te sinte baues messe ende dese chens sal ghedueren tote sesse jaren Ende gherard ende clementie sijn wijf voerseit halmeden hem van al desen lande voerseit ende sie weddent den here jacobe te waerne vri land ende quite land wech ende land met alsuilker scout alser up staet jheghen elken mensche te sinen vrien eghindoeme
</main>
<end>
Ende omme dat wie scepene voerseit stonden ouer dese ghifte ende ouer desen chens so hebben wie dese lettren ghezeghelt met onsen zeghelen vthanghenden Dit was ghedaen jnt jaer ons heren als men scrijft sijn jncarnatioen M CC Lxx secundo tsaterdaghes na der trinitejt
</end>