Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_11

<begin>
</begin>
<main>
weite masins zoene ende aeghte sijn wijf vercochten der abdessen ende den susteren van sinte claren bi brucge tue ymete lands ende viuentuintich roeden lichtelic min of lichtelic meer die licgen binne der prochie van leffinge jn masins stic up den oestende een half ymet ende viuentuintich roeden jn den hoec up den oestende een ymet viuentuintich roeden min jn hansins stic up den nordende een half ymet ende viuentuintich roeden hier of es die summe tue ymete ende viuentuintich roeden omme ene zeker summe van peneghen die hem te willen es vergouden ende hier of ghauen si wettelike ghifte broeder lambrechte van sinte claren ter abdessen ende ter sustere boef vorseit ende weddent hem te warne vri land ende quite land te vrien eghindome met alse suilker scoud alst gheld Vort so ghaf die broeder lambrecht van der abdessen haluen ende van der sustere haluen vorseit dien weite f masins dit vorseide land terueliken chense omme tiene sceleghe siaers te gheldene te sinte martins messe els iaers met tve pond was te cope ende te uersterfnessen Dit kennen scepenen van den vrien daert voren ydaen was riquard van straten ruddra wouter die wilde bouden van scarpinge weitin balfel lambrecht van zedelghem gillis thiederix zoene jan die weuel ende weitin ratgher
</main>
<end>
Dit was ghedaen int iaer ons heren als men scrijft sijn incarnation m cc ende eenzeuentich saterdaechs na onser vrouwen dach ter lichtmessen
</end>