Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_2

<begin>
</begin>
<main>
Willekin lammin ende margriete sijn wijf vercohten der abdessen van sinte claren ende den susteren van sinte claren bi brucge tue ymete lands ende viertich roeden lichtelic min of lichtelic meer die licgen binne der prochie van leffinge daer die willekin up woent dat heet boudolfs belc omme ene zeker summe van peneghen die hem te willen es vergouden ende hier of gauen si wettelike gifte broeder lambrechte van sinte claren ter abbedessen ende ter sustere boef vorseit ende weddent hem te waerne vri land ende quite land te vrien eghindome met alse suilker scout alst geldt Vort so gaf die broeder lambrecht van der abdessen ende van der sustere haluen vorseit dien willekine lammine dit vorseide land terueliken chense omme tiene sceleghe siaers te gheldene te sinte martins messe elcs iaers met tve pond was te cope ende te versterfnessen Dit kennen scepenen van den vrien dart voren ydaen was riquard van straten ruddre wouter die wilde bouden van scarpinge weitin balfel lambrecht van zedelghem gillis thiederix zoene jan die weuel ende weitin ratgher
</main>
<end>
Dit was ghedaen int iaer ons heren als men scrijft sijn incarnation m cc lxx ende een saterdaechs na onser vrouwen dach ter lichtmessen
</end>