Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_5

<begin>
</begin>
<main>
bouden but ende xpistine sijn wijf vercochten der abdessen ende den susteren van sinte claren bi brucge viere line lands die licgen binne der prochien van leffinge ende dat heet barten stic daer hie vp woent ende robins spags line Ende hier of ghauen si wettelike ghifte broeder lambrechte van sinte claren ter abdessen ende ter sustere behoef vorseit ende weddent hem te warne vri land ende quite land te vrien eghindome Vort so ghaf die broeder lambrecht van der abdessen ende van der sustere haluen vorseit dien bouden den but dit vorseide land terueliken chense omme tiene sceleghe elx jaers te gheldene te sinte martins messe elx iaers ende tve pond was te cope ende te versterfnesse Dit kennen scepenen van den vrien daert voren ydaen was reinuerd f godelieuen dirkin f ghiselins arnoud f willen gillis f diederix wille f chere willems weite ratgher thirin van score ende wouter f chere akets
</main>
<end>
Dit was ghedaen int iaer ons heren als men scrijft sijn incarnation mcclxxj in die maent van spurkelle
</end>