Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_6

<begin>
</begin>
<main>
Riquard dininc ende steffenie sijn wijf vercochten den broeders van den scamelhuus weken van brucge neghene ymete lands tueendecheuentich roeden min lichtelic min of lichtelic meer die licgen binne der prochie van vlissenghem ter prekelingen viue ymete benorthalf den weghe dat heet die start ende dat daer toe boert ende viere ymete besuuthalf den weghe ende dat heet sampenoys hofstede ende tnaeste stic bewesthalf sampenoys hofstede zonder een omme ene zeker summe van peneghen die hem te willen es verghouden ende hier of ghauen si wettelike ghifte arnoude brantine ter broeders boef vorseit ende weddent hem te warne vri land ende quite land te vri eghindoeme Dit kennen scepenen van den vrien daert voren ydaen was bouden dyserine thomas de hont reinuard porin gillis f thiederix jan niemare wouter f chere akets Oliuier van der haghe ende riquard dininc vp hem seluen
</main>
<end>
Dit was ydaen int iaer ons heren als men scrijft sijn incarnation m cc lxx primo in die maent van spurkelle
</end>