Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_8

<begin>
Jc diederic here van wassenare riddre make cont allen den ghenen die dese lettren sien ofte hoeren sullen
</begin>
<main>
dat jc hebbe vorkoecht mire vrouen vor aleyden van henegouen die miens har jans wief was uan auennis ombe hundert pont hollanser penninghe al mien ambuecht ende mien gherechte dat jc hebbe ten Niewendamme van der west ziden den moelenwerue die be west den niewendamme staet an die nort side van der schie Oestwart tot an sgrauen ambucht ende zuetwart tot der haluer schie ende nortwart tot an dien diec scloete die bi norden den dike gaet ende jc sal behouden die scouinghe van des drussaten lande vort hebbic hore vorkoecht omme die vorghenomede penninghe al die visscerie die jc hadde uan den Ouden damme tot vet in die maze al soe verre als zoe mien was vort sal mien vroue hebben dat ambucht al soe verre buten den dike als siet heuet up den dike ende het mien es
</main>
<end>
omme dat dese koep ende dese vorworde ghestade bliue endese niement wedersegghen ene moghe hier na soe hebbic mienre vrouen desen brief ghegheuen gheuest met minen seghel Dese brief was ghegheuen jn ons heren jaren m cc lxxi des naesten daghes na sinte ghertruden daghe
</end>