Compilatiecorpus Historisch Nederlands 1.0 (CHN): ambtelijke teksten 1250-1800: brugge_1272_9

<begin>
</begin>
<main>
hannin buekel ende katerine sijn wijf vercochten der abdessen ende den susteren van sinte claren bi brucge tiene ymete lands lichtelic min of lichtelic meer die licgen binne der prochien van nieumonstra ende dat heet erenbouds buekels hofstede ende tland datter toe behort ende datter ommetrent leecht dat strect nordward toten hereweghe ende ostward tote willems lande van nieumonstra ende suudward tote bouden f boudens f woebs lande ende westward toter kerken lande van nieumonstra ende een stic lands dat heet matbelc omme ene summe van peneghen die hem te willen es vergouden ende hier of gauen si wettelike ghifte arnoude brantine ter abdessen ende ter sustere behoef vorseit ende weddent hem te warne vri land ende quite land te vri eghindome Dit kennen scepenen van den vrien daert voren ydaen was jhan weuel oliuier van der haghe ihan aket woutra f chere akets thirin van score clais f chere hugs ende hughe strokin
</main>
<end>
Dit was ydaen int iaer ons heren als men scrijft sijn incarnation mcclxx primo in die maent van marte
</end>