Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_1

<begin>
Der bouden Reifin ruddre Ihan f ser philips van poele Reinuard f godelieuen Diederic die vos woutra f ser hakets Reinuart porin Jhan van Cleyhem Olyuier vander haghe Riquard Dyning ende willem die corte wie scepenen van den vrien doen te uerstane alden goenen die dese lettren zullen zien ende horen lezen
</begin>
<main>
dat quamen vor ons Jhan van Cleue ende heilsoeta zijn wijf ende gauen wettelike ghifte ende halmets hem ende wedden tewette te warne jeghen elken mensche Lammine vander scare portre jn brugghe tiene jmete lants lichtelic min jof lichtelic me lant ende wech der toe vri lant Eghin lant ende quite lant te sinen vrien eghindome Legghende jndie prochya ende jnt ambocht van zuenkerke upt vrya vor hannin veis oest ouer den dijc tenen sticke
</main>
<end>
Ende omme dat wi vorseide scepenen stonden ouer dese ghifte die te wette vor ons was ghedaen so hebben wi dese lettren te kennesen vthanghende ghezeghelt met onsen zeghelen Dese ghifte was vor ons ghedaen jnt jaer alsmen scrift van ons heren1 jncarnatioene mcclxx ende drie saterdaghes jn die Cinxe daghe
</end>