Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_14

<begin>
Min here diederic damhoudere rudder jhan van cleihem hughe strokin wouter wilde diederic vos Reinverd porin Ende willem corte wi schepenen vanden vrien doen te wetene al den gonen die dese lettren sullen sien ende horen
</begin>
<main>
dat clais f boudens ende sijn wijf quamen voer ons ende ghauen vp Jhanne den brunen den dischmeester van sinte gilis viere linen lants lichtelijc mijn jof lichtelijc mee ter aermer behoef van sinte gilis Ende der kerke Ende spapen Ende tcosters Ende hebbens hem ghealmet ende gheloeft te wette te ghewaerne tvilke lant heet toestwerf Ende leght in coudekerke prochie westhalf vander kerke daer dese clais f boudens ende sijn wijf vp wonen Ende dit voerseide lant heft dese voerseide clais f boudens ende sijn wijf weder ontfanghen [t]enen erfliken cense omme xiiii s siaers te gheldene telken sinte bamesse Ende an dese xiiii s hebben de aerme van sinte gilis viij s Ende de kerke xxvij d Ende de pape xxvij d Ende de costre xviij d
</main>
<end>
Dit was ghedaen in die burgh tsvridaghes voer sinte thomaes daghe voer [ke]rsavont Jnt jaer ons heren alsmen scrijf deincarnation m cc Lxxiij deincarnation m cc Lxxiij
</end>