Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_15

<begin>
wie boudin reifin boudin die brokra diederic damhoudra rudders wouter die wilde diedric die vos riquard dining oliuir van der haghe reiuard porin lamrecht van zedelghem ende hughe strokin f diedrics wie scepenen van den vrien doen te verstane allen den ghenen die dese leteren sullen zien ende horen lesen
</begin>
<main>
dat cam vor ons franke cleikart ende floriane ziin wiif ende gauen vp te wetteliker ghifte meester henrike van tielt de canonec van sinte marien in brughe te hare kerke boef viere ymete lands lichtelic min of lichtelic mer lighende in tambocht van morkerke te ottinke werue van dien lande soe leghes ij ymete ende i virendeel vpt oude of ten zued ende vort soe leghets ij ymete i virendeel min in den oesterlandinvanc an dien wech ende dit gaet zuut toter leie ende sij weddent hem tewetten tewarne wech ende land eghin land quite land met iiij d siars sculden timet tsgrauen briue ende ter kerken vrieneghidome van sinte marien in brughe ende al dit vorseide lant gaf weder dese vorseide meester henric canonec van sinte marien van hare kerke alue te erueliken cense desen vorseiden franken cleikart om xx s siars goeder vlaemscher peneghe te gheldene te sinte bamesse in elc jar ende alf coep ende alf versterfnesse
</main>
<end>
ende om dat wi scepenen wille dat dese ghifte vast bliue soe ebben wie scepene dese letteren utanghede gheseglet met onsen zeglen dit was ghedaen des saterdags na sinte lucien daghe intiar ons heren als me scriift siin incarnatioen m cc lxxiij
</end>