Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_16

<begin>
Thierin van score woutra tsere akets soene gherard die moer Reinuart porin Lambrat van zedelghem Oliuier van der haghe weitin ratgher ende clais tsere hughes soene Wie scepene van den vrihen doen te wetene allen den ghoenen die dese lettren sullen zien of horen lesen
</begin>
<main>
dat camen voer ons willem wilsoets soene ende adelise sijn wijf ende ghauen wettelike ghifte karstiane van den damme portra in brucghe ter scamelehuuswekene behoef van brucghe van viere linen lands lichtelic min of lichtelic meer dat si hem vercochten ligghende jnt ambocht van vlissenghem ende dat land heet stringheland ende het leghet zuidoest van der scamelehuusweken huse Ende van tveen ymeten lands lichtelic min of meer dat si hem vercochten ligghende jnt voerseide ambocht ofoestalf an tvoerseide land ende het strect van den stringhen oest toten weghe ende het heet die oestmeet Voert so camen voer ons hanne van den vanekine ende adelise sijn wijf ende ghauen wettelike ghifte den voerseiden karstiane ter voerseider scamelehuuswekene behoef van tiene ymeten ende van i line v haste min lands lichtelic min of lichtelic meer dat si hem vercochten ligghende in tambocht van Nieumonstre zuidoest bi der kerke van nieumonstra ende het heet auerams stic ende datter omme leghet Ende dese voerseide willem ende adelise ende hanne ende adelise wedden elkerlijc tvoerseide land dat hie selue vercochte den vorseiden karstiane ter voerseider scamelehuuswekene behoef te warne vri land ende quite land met sire rechter scout jeghen elken mensche te vrien eghindome
</main>
<end>
Ende omme dat wie scepenen voerseit stonden ouer dese ghifte so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men scrijft sijn incarnatioen M CC ende zeuentich ende drie jn die maent van decembre
</end>