Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_3

<begin>
min here riquard van straten min here bouden reifin min here bouden die broekere rudders johan van kleyhem diederic die vos bouden yserin wouter f domini hakets wie scepenen van den vrien doen te verstane allen den goenen die dese lettren sullen sien jof horen lesen
</begin>
<main>
dat cam vor ons willekin f willins ende heilwijf siin wijf ende gauen wetlike ghifte Celien die begghine f johans witten van vier linen lands lichtelic min jof me ligghende binnen den ambochte van clemskerca tuelke land het dat belxin ende leghet westouer dien wech bi hannekins henox an nortalf het die strinc an westalf leghet een stic ende het die sade an zutalf leghet een stic het weits stickellin Vort so gaf weder die vorseide Celie dien vorseiden willekine ende zinen wiue al dat vorseide land te herfliken tsense omme xij s jaerlix goeder vlaemscher peneghe mette cope ende met versterfnesse ende die vorseide xii s te gheldene telken sinte martins messe
</main>
<end>
ende omme dat wie vorseide scepenen willen dat dese dinc bliue vaste ende ghestade so ebben wie dese lettren gheseghelt met onse seghellen vtanghende Dese ghifte was ghedaen tsaterdaghes na sinte amands daghe jnt jaer ons heren als menscrijft siin incarnation m cc lxx secundo
</end>