Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_4

<begin>
Jc alise wouters vlieghers dochter beghine inden wingard bi brucghe doe tewetene alden ghenen die dese lettren sullen sien ofte horen
</begin>
<main>
dat jc al min goed dat ic hebbe in oudenburgh eist haue eist lant welc lant leghet in hofsteden in oudenburgh vanden welken hofsteden vp die eene hofste woend der Gosin die capellaen was camerlincs van oudenburgh dar af es hi mi sculdich l s siaers vp eene andre woend zegher thoroud dar af es hi mi scudich xv s ende vi d siaers vp eene andre woend Clais cupers suster lisebette ende margriete dar af sijn si mi sculdich viij s iij 1/24o min siaers vp eene andre woend lammin desmit dar af es hi mi sculdich xvij s siaers vp eene andre woend Robert allinc dar af es hi mi sculdich xv s siars vp ene andre woend heineman gaye dar af es hi mi sculdich xvi s siaers vp eene andre woend heine been dar af es hi mi sculdich xv s siaers Dese rente van desen voreseiden hofsteden es tegheldene die eene helt tesinte johans messe ende die ander helt tesinte bamesse Van deser renten es mi sculdich der Gosin die capellaen camerlincs van oudenburgh iiij lb xli d min alse van achterstellicheden heineman gaye xvi s lammin desmit xvij s Robert allinc vij s ende vi d ende i esterlinc dese sculd es al van achterstellicheden Dese hofsteden allegader ende dese renten ende dese sculd also si hier voren ghenomet sijn gheue jc alise wouters vlieghers dochter beghine inden voreseiden wingard purlike in rechter alemoesenen derfermerien inden voreseiden wingard in minen vrien wille in miere goeder bedachticheden ende onbedroghen van ymene Ende jc wille dat dese voreseide fermerie hebbe dit goed gheellike also het hier voren ghenomet es altegader ende dat soet houde inde ghedinkenesse miere ziele ende miere vorders voerdan eewelike in paise sonder enich weder roepen ende sonder alle calaenge dit begheric in minen vrien wille ende in minen achtersten
</main>
<end>
Jn orconscap deser ding dedic seghelen dese lettren metten seghelen meester Gilis deken van sinte donaes meester johans canters van sinte donaes des priors vanden predecaren in brucghe mester hughes prochipape van sinte marien in brucghe ende ser willems prochipape inden vingard Actum anno dominj m cc lxxij jn vigilia mathie apostoli
</end>