Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_5

<begin>
Mijn here diedric damhoudere diedric de vos arnoud f willen heinric raueric wouter ser akets sone weite ratgheer dierkin f ghiselins wi scepenen vanden vrien doen teverstane alden ghenen die dese lettren sullen sien jofte horen lesen
</begin>
<main>
dat vore ons cam johan coelewej ende helsote sijn wijf ende gauen teweteliker ghiften joncvrouwe clementien meestricghe derfermerien inden wingard bi brucghe xij ymete lans lichtelic min jof me ter fermerien behoef inden vorseiden wingard welc lant leghet in ardenburgh ambacht in hanekinewerue prochie oest ouer die hee die x ymete daraf hetets een deel lamberts stic bastards ende dat hout ij 1/2 ymet of oest half onder pieters boengard f willems i ymet xxxv roeden min dat weghet vp die noerd side van pieters gracht west ward toter hee toe ende voerd een deel dat heet eylant dat hout iij ymete xxxv roeden min dat weghet suyt ward vt ouer pieters lant f willems toten weghe toe ende voerd die walemeed dat hout iij ghemete ende lxxxix roeden ende voerd i line ende x roeden dat leghet of west half an lamberts lant f willards ende een deel dat heet boterbelec dat hout ij ymete die licghen west ouer die hee wech ende lant quite met siere rechter scout te haren vrien eghindome weddensijt hare teghewarne yeghen elken mensche
</main>
<end>
ende omdat dit wettelike vore ons was ghedaen ende dese dinc sal bliuen vast ende ghestade so hebben wi dese lettren gheseghelt met onsen seghelen vte hanghenden dit was ghedaen int jaer ons heren datmen scriuet m cc lxx ij in onser vrouwen daghe in marte
</end>