Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_6

<begin>
</begin>
<main>
Jhan die moelnare portra jn brugghe Adelisa zijn wijf Louwerin die witte ende magrieta zijn wijf gauen wettelike ghifte ende gheloueden te wette te warne jeghen elken mensce jhanne den brunen die woent naest der ouderburze portra jn brugghe scouents boef van sinte Claren bi brugghe onderhalf jmet Ende daerdalf Roede lants lichtelic min jof lichtelic me lant ende wegh vri lant eghin lant ende quite lant tharen vrien eghindome legghende jn die prochya van sinte marien jnt ambocht van zieselschen bewest half sinte claren aluaste ander frerinnen lant van sinte claren Dit kennen scepenen vanden zieseelschen heineman vander biest Jhan die foccra pieter oudkoren jan mast ende jhan tokel
</main>
<end>
Ende omme dat dese ghifte te wette vor ons was ghedaen so hebben wi vorseide scepenen dese lettren te kennessen vthanghende ghezeghelt met onsen zeghelen Dit was vor ons ghedaen svrindaghes vor meiedaghe anno domini m cc lxx tercio
</end>