Compilatiecorpus Historisch Nederlands 1.0 (CHN): ambtelijke teksten 1250-1800: brugge_1273_9

<begin>
Colard van leffinghe Coene maegh Jhan die foccre Jhan tokel Jhan mast Pieter oudkoren ende Riquard f Guthers wie scepenen vanden zieselschen tien tyden dat dit was ghedaen doen te verstane alden goenen die dese lettren zullen zien ende horen lesen
</begin>
<main>
Dat bi den baeliu ende bi den scouteten vanden zieselschen ende bi ons ende bi wette een waterganc es gheleit te doen makene tuschen der niewer fermerie van brugghe lande jn die prochia van sint crues ende Jan copmans lande porters jn brugghe jnvallende vten groten weghe tote jnden ouden waterganc die wide alse groet alsoe vallen mach tuschen den pothen die an wederzide staen Ende desen cost zullen ghelden alle die goene dien scepenen vanden zieselschen iof dien die sire toe nemen dinct dat sire bate af hebben ende tharre bate ghemaect es
</main>
<end>
Ende omme dat wi willen dat dit vast si ende ghestade so hebben wi vorseide scepenen dese lettren vthanghende te kennessen ghezeghelt met onsen zeghelen Dit was aldus te wette ghedaen ende dese waterganc te wette gheleit te doen deluene jnt jaer alsmen scrift van ons heren jncarnatioene mcclxx ende drie smanendaghes na sint Jhans daghe mid zomers ghezelt
</end>