Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_1

<begin>
Der bouden die broekere ruddre Jhan van poele Diederic die vos Riquard dining Reinuart f godelieuen Jhan haket bouden van scarpinghe ende olyuier vander haghe wie scepenen van den vrien doen te uerstane alden goenen die dese lettren zullen zien ende horen lezen
</begin>
<main>
dat quamen vor ons dese vorseide olyuier vander haghe ende ghertrud zijn wijf ende vercochten meester arnoude vanden groenendike ter kerke boef van sinte donaes jn brugghe ende gauen hem wettelike ghifte ende wedden hem te wette te warne jeghen elken mensche ter vorseider kerke boef zeuen jmete lants lettel min iof me bede lant ende wegh der toe vrilant eghinlant ende quite lant legghende bede jn die prochia ende jnt ambocht van zuenkerke upt vria benorden des olyuiers huze tenen sticke an den wech Ende dese vorseide meester arnoud van den groenendike gaf desen vorseiden olyuiere vander kerken alue sinte donaes al dit vorseide lant ende ghertrude sinen wiue weder terueliken cense omme vierdal pont goeder vlaemscher peneghe siaers te gheldene te medewintra ende binnen meie telken termine dene helt vanden cense
</main>
<end>
Ende omme dat dit aldus vor ons was ghedaen so willen wi dat vast si ende wel ghehouden ende hebben dese lettren te kennessen ghezeghelt met onsen zeghelen ende ic olyuier vander haghen up mie zeluen ende up mijn vorseide wijf Dit was vor ons ghedaen anno domini m cc lxx quarto svrindaghes vor sint carstoffers daghe binder maent van hoiemaent
</end>