Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_10

<begin>
Wie bouden refin ruddre johan van kleihem bouden van scarpinc reinvard f vergodeleuen clais sere hughes soene wenin van versenare reinvard porin weite ratgher hugo strokin f diderix boidin f alards ende bouden dyserin schepenen van den vrien orconden ende doen teuerstane allen den goenen die dese lettren sullen zien ende horen lesen
</begin>
<main>
Dat cam vor ons jhan cloeter ende beatrisa zin wif ende gauen wettelike ghifte der vrouwen beatrisen abbedesse van markehem te gots huse beof van markehem van achte ymete lands lichtelic min of lichtelic me lighende binnen den ambochte van wome dar vp dat woent dese vorseide ihan cloeter ende beatrise zin wif ende hetet parc ende sie weddents haere te wette tewaerne wech ende lant ende quite erue te gods huse vrien eghindome vort al dit vorseide lant gaf weder dese vorseide beatrise abbedesse van den gods hus haluen van markehem vorseit desen vorseiden hanne cloeter te Eruelike cense omme drie pont tsiars goeder vlamscher peneghen tegheldene dene helt sinte iohans messe ende die ander helt sinte bamesse in elc iaer sonder coep ende versteruenesse
</main>
<end>
ende om dat wi scepenen dit kennen ende wi willen dat dit vast blive ende ghestade Soe hebben wi scepenen in kennessen van deser dinc dese lettren vthankende bezeghelt met onse seghellen dese ghifte was ghegheuen des saterdaghes na vtganchende meye int iaer ons heren als me scriift ziin incarnation M CC lxx quarto jn wedemant
</end>