Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_11

<begin>
riquard dining clais sere hughs soene boidin f alards wouter sere hakets soene weite ratgher johan weuel ende willem die Corte wie scepenen van den vrien orconden ende doen teuerstane allen den goenen die dese lettren sullen sien ende horen lesen
</begin>
<main>
dat cam vore ons arnoud minne ende margarieta zin wiif ende gauen wettelike ghifte mester heinrike den jonghen den canonec van sinte marien in brugghe ter vorseider kerke beof van sinte marien van vive ymete eghins lants lichtelic min of lichtelic me lighende in die prochghie van hanekinwerve ende binnen den ambochte van ardenburgh ende es gheheten inghelghers lant dar die boengart up staet ende also vele vort westwart tote v ymete ende weddets hem tewette tewaerne quite lant met sire rechter scult ende met al die weghe dieter toe heift ter kerke vrien eghindome ende aldit vorseide lant gaf weder dese vorseide mester heinric die canonec van der vor seider kerke halue van sinte marien in brugghe desen vorseiden arnoude minne te eruelike cense omme drie pont tsyars goeder vlamscher peneghen tegheldene elcs jars die hene helt sinte bamesse ende die ander helt te medewintre met haluen cope ende versteruenesse
</main>
<end>
ende om dat wie schepenen dit kennen ende wie willen dat dese dinc vast zi ende ghestade soe hebben wie schepenen in kennessen van deser dinc an dese lettren huthancghende gheanghen onse zeghellen dese ghifte was ghegheuen des vriendaghes vor sinte johans daghe baptist mids zomers int iar ons heren als me scriift zin incarnation M cc lxx quarto jn wodemaent
</end>