Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_12

<begin>
Miin here bouden refin ruddre dideric vos johan weuel bouden dyserin Wenin van varsenare reinvard porin wouter ser hakets soene heinric sere wouters dieren soene hugo strokin f diderix ende clais ser hughs soene Wie scepen van den vrien doen teuerstane allen den goenen die dese lettren sullen zien ende horen lesen
</begin>
<main>
dat cam vor ons jhan f riquards f willemans ende katerina sin wif ende gauen wettelike ghifte mester henrike den jonghen den Canonec van sinte marien in brugghe van vive ymete lands lichtelic min of lichtelic me lighende in die procghie ende binnen den ambochte van lisseweghe ter vorseider kerke beof van sinte marien van welken lande dats en stic hetet boudolfs stic ende dat ander stic hetet clais hofstede ende waer oec dat sake dats hem an die mate iet ghebrake dat hiet nemene soude jn naeste stic lants dat leghet naest boudolfs stic nort ouer tote sire vulre mate ende sie weddents hem te wette tewaerne wech ende lant ende quite lant elc ymet met ene penninghe tsiars ende ter vorseider kerca van sinte marien vrieghindome Vort al dit vorseide lant ghaf weder dese vorseide mester heinric die jonghe canonec van der vorseider kerke haluen van sinte marien in brugghe dien vorseiden jhanne f riquards f willemans ende katerinen zinen wiue te Eruelike cense omme viertich scelleghe tsyars goeder vlamscher peneghen tegheldene elcs iars dene helt sinte bamesse ende die ander helt sinte marien licht messe met haluen cope ende versteruenesse ende dat es teuerstane xx s
</main>
<end>
ende om dat wie scepenen dit kennen ende wi willen dat dit vast blive ende ghestade so hebben wie schepenen in kennesse van deser dinc dese lettren huthanchende bezeghelt met onse zeghellen dit was ghedaen vor ons des vriendaghes vor half hoiemaent int iar ons heren als me scriift siin jncarnation M cc lxx
</end>