Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_14

<begin>
Wie jan van cleihem woutra die wilde dideric die vos jan van poele reinvard porin riquard dining jan die weuel oliuir van der haghe ende weitin ratgher Schepene van den vrien doen teuerstane allen den goenen die dese lettren sullen zien ende horen lesen
</begin>
<main>
dat cam vore ons jan balfel ende gaf wettelike ghifte den here gillise doppe vter ouderburgh van zeuene ymete lands ende van darde halue linen lands lichtelic min of lichtelic me lighende in die prochghie van westkerca binnen den ambochte van ghistelle te tveen sticken ende dat een stic hetet groetstic ende heuet bevaen v ymete lichtelic min of me & bewest half an dat lant leghet weits lant fageldumes beost half leghet michils lant f euerrards benort half leghet helewifs lant pariziis bezued half leghet das vorseit ians lant balfels ende dat ander stic lants hetet zued acker & heift bevaen vij linen lichtelic min of me ende leghet beosthalf onder willems blox ende dit lant wedde hie hem tewette tewarne wech & lant vrie lant & quite lant sonder scult te sinen vrieneghindome vort aldit selue vorseide lant gaf weder dese vorseide dere gillis dop ende adelisa ziin wiif te eruelike cense desen vorseiden ianne balfel om vier pont tsyars goeder vlamscher peneghen tegheldene elx iars dene helt sinte ians messe ende die ander helt sinte bamesse ende half coepe ende alf versteruenesse
</main>
<end>
ende om dat wie scepenen dit kennen ende wi willen dat dit vast bliue ende ghestade so hebben wi an dese lettren gheanghen onse zeghellen dit was ghedaen des saterdaghes na onser vrouwen daghe ter lichtmesse int iar ons heren als me scriift zin incarnation M cc lxx tercio jn die maent van spurkel
</end>