Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_16

<begin>
heineman van der biest riquard f guters gillis van lake jan tokel ende jan mast wie schepenen van den ziecelschen doen te verstane allen den goenen die dese lettren sullen sien jof horen lesen
</begin>
<main>
dat cam vor ons heinric van kleyberghe ende maergriete siin wijf ende gauen wettelike ghijfte janne blancarde den klerc van sinte marien ter kerke boef van sinte marien jn brugghe van drien ymete lands lichtelic min jof lichtelic me ligghende jn die prochie van hoedeleem binnen den ambochte van den ziecelschen ende een ymet lands leghet vp dies vorseids heinrix ende margrieta sins wijfs hofstede ende tue ymete ligghen be suutalf weitins vroeden ende sie weddent dien vorseiden klerc te dier vorseider kerke boef al dit vorseide land weg ende land eghin land ende quite land te wetten te waerne met siere rechter schout diet ghelt te haren vrien eghindome vort so gaf weder die vorseide jan blancard van der kerke aluen van sinte marien dien vorseiden heinrike ende maergrieten zinen wiue al dit vorseide land te herfliken sense omme xx sol jaers goeder vlaemscher peneghe met aluen cope ende met versterfnessen ende die ene helt van dien vorseiden sense te gheldene telken sinte jans messe ende die ander helt te gheldene telken sinte baues messe daer na
</main>
<end>
Dit was ghedaen vrindaghes na sinte denijs daghe jnt jaer ons heren als menscrijft siin incarnation m cc lxx quarto
</end>