Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_3

<begin>
Der bouden die broekere Der diederic die damhoudre Rudders Reinuart f godelieuen Woutra f ser hakets Domaes die hont Jhan die weuel Diederic die vos Jhan van cleyhem ende Jhan haket Wie scepenen van den vrien doen te wetene alden goenen die dese lettren zullen zien iof horen lezen
</begin>
<main>
dat quam vor ons katelina van Ridderuorde die beghine ende gaf wettelike ghifte alarde lamme portra jn brugghe berechtere vander Niewer fermerie vanden begghinen van brugghe die staet jn sint Crues prochya ende den goenen diere berechtighen met hem af zijn ter vorseider fermerien boef zeuentiene jmete lants lettel min iof lettel me Ende wedde dit lant bede lant ende wegh vri lant eghin lant ende quite lant met alsulker scult alst ghelt te vrien eghindome metter huzinghe diere up staet waer af dat een deel leght jn die prochya van sint Jhans vpden dijc jnt ambocht van zuenkerke Ende en deel bede jn die prochya ende jnt ambocht van vtkerke upt vrie
</main>
<end>
Ende omme dat wi vorseide scepenen stonden ouer dese ghifte so hebben wi dese lettren te kennessen vthanghende ghezeghelt met onsen zeghelen Dit was vor ons ghedaen jn die vrie vierscerne anno domini m cc lxx tercio palme zaterdaghe den achtenden dach vor april
</end>