Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_4

<begin>
Boudene van scarpinghen arnoud f willen weitin ratgher jhan die weuel gillis diederics soene boidin f alards ende clais tsere hughes soene Wie scepene van den vrien doen te wetene allen den ghoenen die dese lettren sullen zien of horen lesen
</begin>
<main>
Dat camen voer ons Rike willems soene veradelen soens margriete sijn wijf jhan willems soene veradelen soens ende willem sijn broeder ende ghauen wettelike ghifte arnoude brantine ter scamelehuuswekene behoef van brugghe van zeuenen ymeten ende van ene line ende van zeuen schachten lands lichtelic min of lichtelic meer dat si hem vercochten ligghende jn tambocht van Nieumonstra besuden der kerke van Nieumonstra ende het heet trijxstic ende simoens stic ende willekins veradelen soens hofstede ende sie weddent hem te waerne vri land ende quite land met sire rechter scout te vrien eghindome
</main>
<end>
Ende omme dat wie schepenen voerseit stonden ouer dese ghifte so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men scrijft sijn jncarnatioen M CC ende tseuentich ende drie jn die maent van marte
</end>