Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_5

<begin>
Wouter tsere akets soene Jhan die weuel Oliuier van der haghe Reinuert porin domaes die hont gillis diederics soene willem die corte Clais tsere hughes soene ende hughe strokin Wie scepenen van den vrihen doen te wetene allen den ghoenen die dese lettren sullen zien of horen lesen
</begin>
<main>
dat jmmesoete f willekins f hughes voer ons ghaf up in puerre alemoesene der abdessen ende den zustren van sinte claren bi brugghe al die erue ende alle die cateille die soe hadde binne den ambochte van Nieumonstre of sowaer dat soese hadde binne den brugsen ambochte Ende al die bileuinghe die hare toe comen mach van boudenen heinrics soene woenende jn die prochie van nieumonstra ende van jhanne lambrats soene clercs Ende van al desen voerseiden sticken gaf soe hem wettelike ghifte voer ons na der wet ende na der costume van den lande
</main>
<end>
Ende omme dat dese sticken al dus voer ons ghedaen waren te wetten so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men scrijft sijn jncarnatioen M CC ende zeuentich ende drie jn die maent van Marte
</end>