Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_6

<begin>
Dere pieter van der weide Ende dere Robesoete sere kaerstians soene scepennen van Brugghe doen theuerstaene allen den ghenen die dese lettren sullen zien ende horen lesen
</begin>
<main>
dat cam voer ons als voer scepennen meester Gielis Bonin Deken van sinte donaes ende gaf om ghoede in aelmoesene den zieken lieden van sinte marien magdalenen bi brugghe ende aren proecghi pape ende aren coestra the hescenna ende the gheldena naer siere doet dartigh pont vlaemscher penicghe drie pitantien mede the copenne dene in siens vader jaeritiede symoens bonins the gheuene ouer siene ziela tuelke jaeritiede es der helicgher cruescen avonde in september Dander in adelisen jaeritiede siere mouder the deelna den zieken tuelke jaer ghetiede es sinte jans avonde bi huetganghede hoeust Die darde in sins selues jaeritiede the deelna den zieken Ende van helken van dien drien pitantien voerseiden sal die pape ebben zes penicghe ende die coestra tue penicghe Ende daer bi siense sculdigh the segghena in helc jaeritiede messe ouer die ziela Ende van desen voerseden dartig ponden the heesscena ende the gheldena na siere doet ende niet heer heeuet hie die voerseede zieke lieden van sinte marien magdalenen bezet voer ons ende ouer scepen gheroeppen vp tienscelicghe ende drie penicghe jaerlicsche rente die hie heuet an hene hofstede die leghet bi steuens roeuers daer hertoghe die zeluerina vp hihuuset heuet Ende viue ende vierticpenicghe thiaers die hie heuet an hene hofstede die leghet bacthe ver marien van aerlibeke daer osta van der anghela vp ghehuzet heuet Ende vp vierscela ende zes penicghe thiaers die hie euet lecghende in die voelre strate an hene oefstede daer willems bakers weduwa vp woent Ende vp zesscelicghe thiaers in die naeste hoefstede daer jan van stallille vp woent Ende vp vierscele ende hactpeneghe thiars die hie heuet in die selue straete an hene oefstede daer ysac die maetsennaere vp ghe houset heuet
</main>
<end>
Ende in oerconde van deser ding ebben wi dese lettren ghezeghelt met onsen zeglen Dit was ghedaen sinte donaes in dien choer jnt jaer ons heren als men scriuet dusentich tue hondert ende vier ende seuentigh donres daghes na den andaghe na paeschen
</end>