Compilatiecorpus Historisch Nederlands 1.0 (CHN): ambtelijke teksten 1250-1800: brugge_1274_8

<begin>
Min here bouden brokre ruddre wouter sere hakets soene clais sere hughes sone weite ratgher boidin f alard hughe strokin f diedrix ende dirkin f gilis wie scepenen van den vrien doen te uerstane al den goenen die dese letteren sullen iof horen lesen
</begin>
<main>
dat vor ons cam daniel f ghuters ende marina sijn wiif ende vorkochten meester heinrike van tielt den canonec van sinte marien in brughe ter vorseider kerke boef drie imete lands lichtelic min of lichtelic mee lighende in tamboch van oestkerke ende in die prochie van heile inden oestpolre ende darof hetets en stic alf ymet dar dese daniel selue vp woent ende dat daer omtrent leghet tote drien ymeten oestalf uan dien lande leghet willem f boudens ende bezutalf leghet lambrechts land f reinghers ende van dien lande gauen sij hem wettelike ghifte ende wedden te wetten te waerne wech ende land ende quite erue ende sonder scult ter kerken vrien eghindome ende aldit vorseide land gaf weder dese vorseide meester henric die canonec van der vorseider kerken haluen van sinte marien desen vorseiden daniel f ghuters te erueliken cense omme xxx ta s tsiars goeder vlaemscher peneghe te gheldene dene helt tesinte bamesse ende dander helt te sinte martins messe met aluen cope ende versterfnesse
</main>
<end>
ende om dat wi scepenen dit kennen ende willen dat dit wast bliue ende ghestade soe ebben wi scepen dese lettren ghezeghelt met onsen zeghlen vtanghende dit was ghedaen des saterdaghes vor meie daghe in tiar ons heren als men scriuet zin incarnatioen mcclxx quarto in die maent van april
</end>