Compilatiecorpus Historisch Nederlands 1.0 (CHN): ambtelijke teksten 1250-1800: brugge_1279_1

<begin>
Wie schepenen vanden vrien Reinvaerd f vergodelieuen bouden diserine Rudders weinin van varsenare Reinvaerd porin Jan die brune Gielis f wouters Ende Gheraerd f Gheraerds Doen tewetene allen den goenen die dese lettren zullen zien jof horen lesen
</begin>
<main>
dat quamen voer ons wouter f latissen Ende lisebette sijn wijf Ende gauen pietre f hannins alaerds vp tesinen vrien eghindoeme halme ende wettelike ghifte van drien ymeten lands lichteleic meer jof lichteleic min lichghende in die prochie van zeuencote jn die bemelaringhe twilke land heet adelisen Maleghers stic Ende sie weddent hem vri land quite land wech ende land ende tewette tewaerne met siere rechter schuld dat es vichtich peneghe vlaemsche tsiaers die men ghelt den mueneken van sinte andries Ende dese voerseide pieter f hannins alaerds Gaf woutren f latissen ende lisebetten sinen wiue voerseid weder dit voerseide land te eerueleken chense omme tvintich scheleghe vlaemsche ende tvee capoene tsiaers tegheldene dene helt tesinte jans messe middelsomers Ende dandre helt te sinte bamesse daer na elx jaers met sinen rechten cope ende versteruenesse
</main>
<end>
Ende bedi dat wie voerseide schepenen waren ouer dese voerseide ghifte Ende ouer dese voerseide voerwoerde vanden chense willen datse bliue vast ende ghestade So hebben wie tekenne dese lettren vthanghende ghezeghelt met onsen zeghelen dit was ghedaen jnt jaer ons heren alsmen screef sijn incarnatie dusentich tve hondert seuentich ende neghene saterdaghes na onser vrouwen daghe ter lichtemesse
</end>