Compilatiecorpus Historisch Nederlands 1.0 (CHN): ambtelijke teksten 1250-1800: brugge_1280_1

<begin>
hets gheordinert biden bailliu ende bi schepenen van brucghe jnt jaer ons heren mcclxxx sabbato ante festum beati michaelis
</begin>
<main>
Dat niet ne gheorlouet iemene eninghe te makene vppe vitaillien of vp dat ter vitaillie toe behoert jof coepmanne op makelare jof makelare vp coepmanne jof coepman jeghen coepman jof makelare ieghen makelare die hier jeghen dade ende bedraghen worde bider wareide hie ware in misdaden derste waeruen van iij lb jeghen den here Ende van iij lb jeghen de stede & worde hies anderwaruen bedraghen hie ware in misdaden van x lb hier of zal hebben die here dene helt ende de stede dander helt Ende worde hies darde waruen bedraghen hie ware in misdaden van xx lb hier of zal hebben die here dene helt ende de stede dander helt ende mezoudene bannen alse langhe alse schepenen goed dochte tusschen vi jaren ende enen jare vp sine wet Vort zo ne gheorlouet het niet iemene eninghe temakene jeghen den here jof jeghen die stede zowie zo hier jeghen dade ende der of verwonnen worde bider wareide hie ware in misdaden van l lb Ende me zoudene bannen tussche vi jaren ende enen jare also langhe als schepenen Goed dochte vten lande van vlaendre vp sine wet vort zo ne ghehorlouet het niet enich ambochtslieden tevergadren bouen hem vij ende dit omme die nutschepe van haren ambochte ende met dien vij zo moeste wesen die Deken van haren ambochte ende merre deel van sinen vinders Ende dese vergadringhe moet wesen in die buergh tusschen aluondertiid ende vespertiid vte ghenomen ter wet tegane elkerliic daermet dinghet van haren ambochte ende met andren lieden in meentuchten Zo wie die hier jeghen dade ende daen of verwonnen worde bider wareide hie verbuerde x lb Ende hier of zal hebben die here dene helt ende destede dander helt Ende mesoudene bannen tusschen vi jaren ende enen jare also langhe als schepenen Goed dochte vp sine wet vort zo eist ghecuert dat zo wat lieden die ghelt ghegadert hebben in meentuchten dat siet bringhen in buerghemeesters ende in schepenen handen bin viij daghen die dis niet nedade ende dan of verwonnen worde bider Goeder wareide hie verbuerde l lb ende het ne gheorlouet niemen enigh ghelt vort an tegaderne in meentuchten vp die vorseide boete het neware bi schepenen vort eist ghecuert dat zowat ambochts man die comen es in die stede zident oeust harewaert ende ziin ambocht hier wille doen dat hie comen moet metten Deken vanden ambochte ende ij vinders ende met sinen meester daer hie mede werken wille ende doen hem scriuen inder stede brief ende winnen ziin porterscheip ende ware dat sake dat Goene Deken ende vinders waren van haren ambochte dat sie brochten met hem ij Goede lieden van sinen ambochte ende winnen siin porterscheip Die dis niet ne dade jof die meester diene tewerke sette elc ware in boeten van iij lb Ende dese mach die scouteten zoeken met ij schepen jof met ij porters vort eist ghecuert dat niemen gheorlouet ghilde tesittene jof meentucht van ghilde temakene no in ghilde tetene bi erre mile ihende brucghe die ghilde sette jof die Goene in wies huus dat messe sette elc ware in boeten van x lb ende elc dier ate verbuerde iij lb Ende dese mach die scouteten zoeken met ij schepenen jof met ij porters
</main>
<end>
</end>