Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_1

<begin>
Reinuert porin Oliuier van der haghe Weinin van varsenare jhan aket Gherard die weuel hannoet casekin ende jhan die boye Wie scepenen van den vrien doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons jhan wermouds soene ende adelise sijn wijf ende boudene dies jhans broeder ende kateline sijn wijf ende ghauen wettelicke ghifte der abdessen van spermaelgen van tveen jmeten lands lichtelic min of me ligghende bin den ambochte ende binder prochien van moerkerke ten zuidende jn die nere ende sie halmedens hem te wetten ende sie weddent hare te wetten te waerne vri land ende quite land ieghen elken mensche met sire rechter scout te haren vrien eghindoeme Voert so ghaf die voerseide abbedesse teruelicken chense dien voerseiden jhanne ende adelisen sinen wiue ende dien voerseiden boudenen ende katelinen sinen wiue die voerseide tve jmete lands lettel min of me omme dartich sceleghe ghoeder vlaemscher peneghe elx jaers te gheldene dene helt te sinte martins messe ende dandere helt te onser vrouwen daghe ter lichtemesse daer na Ende die voerseide jhan wermouts soene ende adelise sijn wijf ende Boudene dies jhans broeder ende kateline sijn wijf worden voer ons wettelicke Eruelicke chensers der abdessen van spermaelgen voerseit van dien voerseiden lande omme die voerseide somme van peneghen jaerlics te gheldene eruelicke ten voerseiden terminen
</main>
<end>
Ende omme dat wie scepenen voerseit willen dat alle dese voerseide sticke bliuen vast ende ghestade also als sie voerseit sijn die voer ons waren ghedaen wel ende te wetten so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men screef sine jncarnatie tvelef hondert ende tachtentich tsaterdaghes voer sinte vincensis daghe Dese vorseide peneghe sal ontfanghen suster clementie alse langhe als soe leeft ende tende haren leuene jnt goets huus
</end>