Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_10

<begin>
Miin here willem van straten ruddre willem f domini willemans thomaes die hont willem die corte jan mont gillis f wouters ende Langhe jan van caedsant wie scepenne vanden vrien doen teverstane allen den goenen die dese lettren sullen sien jof horen lesen
</begin>
<main>
dat cam haruaerds vor ons jan f willems f heinrix ende Lisebette sin wijf ende gaven wettelike ghifte joncvrouwen saren meestrighe vanden hospitale van onser vrowen staende vp die potterie van viere ymete lants lichtelic min iof me leghende binden ambochte van oestburgh indie prochie vanden sconendyc nordoest vander kerke & heet wouters f harnaerds hofstede ende die waerd of sutalf anden hievindyc & sie weddets desen vorseiden joncvrowen saren tes hospitaels boef vorseit tewette tewaerne wech & Lant & quite Lant te dis hospitaels vrien eghindoeme ieghen elken meinsche Ende dese vorseide joncvrowe sare gaf weder vp dien vorseiden janne f willems f heinrix van dis hospitaels haluen vorseit aldit vorseide lant te Erfliken Cense omme dartich sceleghe tsiaers goedere vlaemschere peneghe tegheldene die ene helt telken sinte maertins messe ende die ander helt telker alf maerthe die daer naest comt ende te cope & teversterfnesse een pont was
</main>
<end>
ende omme dat wie vorseide scepenne willen dat dese dinc vast bliue & ystade So hebben wie dese lettren tekennessen yseghelt met onsen zeghelle dit was ghedaen in sinte maerx daghe anno domini M CC Lxxx primo
</end>