Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_13

<begin>
Mijn here willem van straten ruddre Diederijc die vos Reinvart poerijn hughe vten houe jan van den poele wouter f boidins boudene f boudens wie scepenen van den vrien doen te wetene hem allen die dese lettren zelen zien of hoeren lesen
</begin>
<main>
dat Camen vor ons als vor vrihe scepenen boudene f domaes ende adelice zin wijf ende gauen den meester van zente ians hues in brughe broeder ian den zuaef tsuorseids hospitaels boef wettelike ghifte van tween ghemeten lands lichtelijc meer of min lighende in sente pieters capelle te honkevliete west Ende weddets hem daer te waerne vri lant ende quite lant tsuorseids hospitaels vrihen eeghinen doeme Ende daer so nam die vorseide boudene f doemaes die vorseide twee ghemete lands teenen erueliken Cenze om tien scelghe vlaemser peneghe elx iaers te gheldene te sente bamesse ende te sente martijns messe van broeder ianne den zuaef meester vorseit van tsuorseids hospitaels haluen
</main>
<end>
Ende om dat wie voseide scepenen stonden ouer dese ghifte ende ouer dese vorewaerde so hebben wie dese lettren vthanghende gheseghelt met onsen zeghlen in kennessen dier wareiden Dit was ghedaen int iaer ons heren als men screef zijn incarnatioen twaelf ondert iaer ende een ent tachtich tsaterdaghes nader helegher Crucen dach in die maent van meye
</end>