Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_14

<begin>
Min here bouden die broekra ruddra diederic die vos Oliuier vander haghe arnoud f heinemans hannot casekin willem scoutete jan die brune gillis f ser hughes hughe van boyenghem & wouter f boidins Wie scepenen vanden vrien doen te verstane allen den goenen die dese lettren sullen sien iof horen lesen
</begin>
<main>
dat Cam vor ons weitin zuerinc ende heile siin wijf & gaven wettelike ghifte marien f iacobs f vermarien van viere ymete lands & een alf ymet lands lichtelic min iof me licghende binden ambochte & in die prochie van zouwenkerke & van al desen lande so hetets drie ymete lands die vule polre & een ymet lands & een alf ymet lands leghet af nortalf an dese vorseide drie ymete lands & sie weddents hare al dit vorseide land wegh & land quite land te wetten te waerne te haren vrien eghindome Vort so gaf die vorseide marie dien vorseiden w[e] zueringhe al dit vorseide land te cense tote viere jaren die naest comen omme viue pont siars goedere vlaemscher peneghe te gheldene die ene helt telken sinte bamesse & die ander helt te vastenavonde die daer naest comt & so weltijt dat dese vorseide w[e] zuerinc ghevet deser vorseider marien tvintich pont vlaemscher peneghe binnen der vorseider termine metter scult vanden jare so es dit land quite vander helt vanden cense & vort so weltijt dat dese w[e] zuerinc ghevet deser vorseider marien binder vorseider termine noch tvintich pont metter scult vanden jare so es dit land quite alghehelike van desen vorseiden cense & dese vorseide marie wedde ghifte te ghevene w[e] zuerinc vorseid iof zinen hoor van al desen vorseiden lande naden viere jaren vorseid bi also dat dese marie dese viertich pont vorseid ontfanghen heft & ne ghevet dese w[e] zuerinc deser marien dese xl lb niet binder vorseider termine so es dit vorseide land deser vorseider marien quite herve
</main>
<end>
& in kennessen van deser dinc hebben wie vorseide scepenen dese lettren gheseghelt met onsen zeghellen dit was ghedaen saterdaghes vor alf meye anno domini m cc lxxxj
</end>