Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_15

<begin>
Min here willem van boneem Min here bouden die broekere rudders thieric die vos hughe vanden hove wilsin van scarpinghe arnoud f heinemans & wouter f boidens Wie scepenne vanden vrien doen teverstane allen den goenen die dese lettren sullen zien & horen lesen
</begin>
<main>
dat cam vor ons Maergriete maertins hurters wedewe griele haer dochter & adelise haer dochter & gauen wettelike ghifte den here Lambrat den corenbitere canoenec van sinte donaes in brughe van enen ymete lants & een half ymete lants lichtelic min iof me leghende int ambocht van meetkerca in die prochie sinte pieters vpten dyc van desen lande heet een ymet braec stic & dat ander half ymet heet die strinc & leghet vor deser margrieten duere ende sie weddets hem te wette te waerne wech & lant & quite lant te sinen vrien eghindome ieghen elken meinsche & dese vorseide here Lambrat die corenbitere die gaf weder deser vorseider Margrieten & haren kindren vorseit aldit vorseide lant te Erfliken cense omme tuyntich sceleghe tsiaers goeder vlaemscher peneghe & tve capoene tegheldene die ene helt telken sinte maertins messe & die ander helt te hutganghende meye die dar naest comt
</main>
<end>
& in kennessen van deser dinc datse vast & ystade bliue hebben wie vorseide scepenne dese lettren yseghelt met onsen zeghellen dit was ghedaen vrindaghes vor sincsen anno domini MCC Lxxx primo
</end>