Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_16

<begin>
Wi boudene die broekre ruddre reinuard porin jhan die brune gherard die weuel hughe van boeienghem dierkin f ghiselins Ende jhan van tarrendike scepenen van den vrien doen te verstane hem allen die dese lettren zullen zien ende horen lesen
</begin>
<main>
dat quamen vor ons hars dancs ende hars willen weitkin f foitins ende heilota zijn wijf ende gauen wettelike halm ende ghifte den here ihanne capellaen te sente obrechts te brugghe van drien ghemeten ende ene line lands lichtelic min of lichtelic meer ligghende in die prochie van bredene te desen benomenden sticken tstic dat heet die euendijc v linen jn de reet i m jnt west lant an doest side ij linen Ende die vorseide weitkin ende heilota gheloueden dien vorseiden here ihanne weghende lant vri eghin ende quite te wette te waerne te wllen eghindome ieghen elken mensche Vord gaf die vorseide here ihan dit vorseide lant dien vorseiden weitkine ende heiloten te eruelike chense omme twintich scheleghe vlaemsche elkes iaers te gheldene dene helt te sente ihans messe ende dander helt te medewintre der naer Ende coep ende versterfnesse ghelijc den chense alst gheuallet
</main>
<end>
Ende om dat wi vorseide scepenen willen dat dit vast bliuet ende ghestade so hebben wi dese lettren gheseghelt met onsen zeghelen Dit was ghedaen in die borech saterdaghe vor sente baernebaes daghe int iaer ons heren als men screef zijn incarnation mcclxxxi
</end>