Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_17

<begin>
Wie scepenen vanden vrien bouden die broekre bouden dizerijn Rudders Jan die brune Olivier vander haghe Domaes die hond Jan mont arnoud f heinemans ende bouden f boudens Doen te wetene alle den ghoenen die dese lettren sullen sien jof horen lesen
</begin>
<main>
Dat quamen vor ons willem f boudens ende adelise zijn wijf ende gauen wettelike ghichte gielise Clawaerde van dardaluen jmeite lands lichtelic min jof me legghende binnen den hambochte ende binnen der prochie van jabbeke benoerden der kerke jnden broec Ende heet doost gorgherde Ende si weddent hem te wette te waerne jeghen elken mensche vri eghin land ende quite wegh ende land te sinen vrien eghindoeme Ende dese vorseide gielis Claward ende Marie sijn wijf gauen weder te erueliken chense dit vorseide land desen vorseiden willemme f boudens omme dartich sceleghe goeder vlaemscher peneghe elx jaers te gheldene sinte Martins messe met wllen cope ende met versteruenessen ghelijc den chense alst gheuald
</main>
<end>
Ende omme dat wie vorseide scepenen vanden vrien stonden ouer dese wettelike ghichte ende dese verchensinghe dat si vast sullen sijn ende ghestade So hebben wie dese lettren jn kennessen vthanghende ghezegheld met onsen zeghellen Dit was ghedaen jnt jaer ons heren alsemen screef zijn jncarnatioen m cc ende lxxxi vp sinte baselis daghe
</end>