Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_18

<begin>
Boudene die broekere Boudene dyserine rudders willem die scoutete hughe van den houe Lambrat diedrix soene willem van cleiem ende gillis wouters soene wie scepenen vanden vrihen doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons wouter willems zoene ende margriete sijn wijf ende ghauen wettelicke ghifte arnoude Brantine ter abdessen ende tsconuents boef van sinte claren in brugghe van achte jmeten lands lichtelic min of me van welken lande ligghens vive linen ende een half line jn tambocht ende in die prochie van zuwenkerke ende het heet Riquards willemans soens hofstede ende het leghet tusschen den hereweghe ende der nonnen lande van sinte truden Ende drie linen ende een half line heet poerterstic ende het leghet besuden lodewijcs f zotegoeds in die prochie ende in tambocht van dudsele Ende tve linen ende vive ende zeuentich roeden heet riquards slorins hofstede ende het leghet ander moeneke land van der does in tambocht ende in die prochie van dudsele Ende een line ende zeuene ende tvintich roeden heet margrieten bleiuins stic ende leghet benorden hannekin f veradelisen Ende viere linen heten margriete hemebrants stic ende het leghet benorden hannekins f veradelisen Ende tve jmete ende een vierendeel jmets leghets bezuiden boudens claimans hofstede ende boesthalf der steenbrucghe Ende sie halmeden hem te wetten van den voerseiden lande Ende sie weddent dien voerseiden arnoude te wetten te waerne vri land ende quite land met sire rechter scoud ter voerseider abdessen ende tsconuents vrien eghindoeme
</main>
<end>
Ende omme dat wie scepenen vorseit willen dat dit vast ende ghestade bliue so hebben wie dese lettren ghezeghelt met onsen zeglen jn kennessen Dit was ghedaen jnt jaer ons heren als men screef sine jncarnatie tvelef hondert ende een ende tachtentich vp sinte baselis daghe in den zoemer
</end>