Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_19

<begin>
Bouden die broekere jhan die hamer rudders heinric scaefscacht hughe van boyenghem weinin van varsenare willem van cleiem ende wilsin van scarpinghen wie scepenen van den vrien doen te wetene alden ghoenen die dese lettren zullen zien of horen lesen
</begin>
<main>
dat camen voer ons hughe jhans zoene ende aechte sijn wijf ende ghauen wettelicke ghifte arnoude brantine ter abdessen ende tsconuents boef van sinte claren in brucghe van anderhaluen jmete lands lichtelic min of me ligghende binden ambochte van oestburgh ende binder prochien van der niewerkerke of nordhalf an dies voerseids arnouds brantins land streckende ende an toestende van jhans f betten lande ende ant westende van bertolfs f jhans lande ende sie halmedens hem te wetten ende sie weddent hem te wetten te waerne vri lant ende quite land met sire rechter scout ter voerseider abdessen ende tsconuents vrien eghindoeme Voert so cam die voerseide arnoud brantin ende gaf dien voerseiden hughen f ihans ende aechten sinen wiue teruelicken chense tvoerseide land alse procurerre van der abdessen haluen ende tsconuents van sinte claren omme tvintich sceleghen vlaemscher peneghen te gheldene elx iaers te halfmarte met tveen capoenen te cope ende te versterfnessen of tvelef peneghe vlaemsche ouer elken capoen Ende daer worden die voerseide hughe ihans zoene ende aghete sijn wijf wettelicke Eruelicke chensers dies arnouds alse procurerers ter vorseider abdessen ende tsconuents boef van dien anderhaluen jmeten lands vorseit omme die vorseide somme van peneghen elx jaers te gheldene ter voerseider terminen ende met alsuilken cope ende versterfnesse alst vorseit es
</main>
<end>
Ende omme dat wie scepenen vorseit willen dat die voerseide sticke bliuen vast ende ghestade also als sie voerseit sijn so hebben wie dese lettren ghezeghelt met onsen zeghelen in kennessen Dit was ghedaen jnt jaer ons heren als men screef sine jncarnatie tvelef hondert ende een ende tachtentich tsaterdaghes voer sinte ihans daghe die es te midzoemere
</end>