Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_2

<begin>
Wie scepenen vanden vrien Hughe vanden houe Jan die brune Reinuaerd porijn Jan die weuel Arnoud heinemans soene Wouter boudens soene ende Gherard die weuel Doen te wetene alle den ghoenen die dese lettren sullen zien jof horen lezen
</begin>
<main>
Dat quamen vor ons heinric lombaerd ende Lisemoed sijn wijf ende ghauen wettelike ghichte jongvrouwe katelinen cants van viere ymeite lands ende van ene ende dartigh scachte lichtelic min jof me ende es gheheten die oostmaet ende vort van vierdalf linen ende vijf scachte lichtelic min jof me ende es gheheten osseghers hofstede entie woeninghe diere toe behort Legghende jn die prochie van snelleghers kerke Ende dit wedden si hare vri land quite land wegh ende land jeghen elken mensche te haren vrien eghindoeme ter fermerie boef sinte obrechts die wilke staet buten der ouder muelne jn die prochie van sinte cruus
</main>
<end>
Ende omme dat wie vorseide scepene stonden ouer dese wettelike ghichte dat soe vast sal zijn ende ghestade So hebben wie dese lettren jn kennessen wthanghende gheseghelt met onsen seghellen Dit was ghedaen jnt jaer ons heren alsemen screef zijn jncarnatioen mcc ende lxxx des vrijndaghes na sinte vincencis daghe
</end>