Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_20

<begin>
arnoud zigher jhan rapart wouter roeuvlesch dancard merlin ende pieter jhans zoene wie scepenen vanden moere doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons hanne die brune jhans Brunen neue marselis sijn broeder robsoete tsere kerstiaens zoene jhan alardijn ende pieter steenkin voeghede dies voerseids hannes ende marselis ende ghauen wettelicke ghifte broeder lambrechte van sinte claren ter abdessen ende tsconuents boef van sinte claren in brugghe van viue buinre moers die was tsere jhans brunen tsouden die leghet vp die vakeleet ende sie halmedens hem te wetten ende sie weddene hem te wette te waerne vrien moer ende quite moer met sire rechter scoud ter voerseider abdessen ende tsconuents vrien eghindoeme Ende die voerseide hanne ende marselis sijn broeder wedden dien broeder lambrechte dien moer te waerne ende belouedene te houdene onghecalengier ende quite van alre scout tote diere wile dat dese lettren ende dese ghifte was ghegheuen
</main>
<end>
Ende omme dat wie scepenen voerseit willen dat die voerseide sticke bliuen vast ende ghestade so hebben wie dese lettren ghezeghelt men onsen zeglen jn kennessen Dit was ghedaen jnt jaer ons heren als men screef sine jncarnatie tvelef hondert ende een ende tachtentich tsvrinendaghes voer die diuisie van den apostlen jn hoymaent
</end>