Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_21

<begin>
Min here bouden die broekre Min here jan die hamer Min here wouter van esine rudders thieric die vos jan vanden zande jan mont lambret f thieric van rasewale bouden f boudens ende jan van terrendyke wie scepenne vanden vrien doen teverstane allen den goenen die dese lettren sullen zien & horen lesen
</begin>
<main>
dat cam vor ons willem f lisebed ende cateline f boudens manghelins sin wijf & gaven wettelike ghifte den here janne hals capellaen van sinte saluators in brughe ter Meentucht boef vander kerke van sinte saluators vorseit van viere ymete lants lichtelic min iof me leghende int ambocht van bredene hoec oest over die zilinghe van desen vorseiden lande heet een stic lants lams belec & of northalf desen lande gaet die herewech & of suthalf so leghet coppins ties kint lant ende van desen vorseiden lande heet een stic lants waerte meed & andie nortside so leghet hoghewaerd & of suthalf so leghet hanne ballinx wedewe lant & een stic van desen lande heet die bodem & leghet of oestalf an boidin bertolfs lant & of westalf so leghet heinrix f boidins lant & een ander stic van desen vorseiden lande heet weitins hammans ofstede & of nortalf der an gaet een lant wech & of westalf so leghet gheraert f gheraerts kindre lant & die vorseide willem & cateline sin wijf wedden den here janne hals vorseit aldit vorseide lant tewette tewaerne ter Meentucht boef vander kerke van sinte saluators vorseit wech & lant eghin lant & quite lant ter vorseider Meentucht boef vrien eghindoeme jeghen elken meinsche
</main>
<end>
Ende omme dat wie vorseide scepenne stonden over dese ghifte van desen lande & wie willen dat soe vast & ystade bliue so ebben wie dese lettren te kennessen hutanghende gheseghelt met onsen zeghellen dit was ghedaen sfrindaghes vor sinte Marien maddalenen daghe anno domini M CC lxxx primo
</end>