Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_22

<begin>
Boudene die broekere jhan die hamer rudders diederic die vos Reinuert porin willem die scoutete jhan die brune weinin van varsenare arnoud heinemans zoene willem van cleihem ende woutre boidins zoene wie scepenen van den vrihen doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons boudene die wale ende margriete sijn wijf ende ghauen wettelicke ghifte jhanne cortscoue ende vergrielen sire zuster van zeuentiene jmeten ende ene line lands lichtelic min of lichtelic me ligghende binden ambochte ende binder prochien van Nieumonstra Ende van dien lande hetens vierdalf jmet arlebouds werf ende een half jmet tsconincs werf ende viue linen ende een half line jsaacs werf Ende vierdalf line jn tveen stringhen daer lise willems ende wouter stenin vp woenden ende vive jmete hetens jnghels stic ende roedolfs strinc ende daer binnen sijn vive linen die waren hannekins hannins zoens hughes zoens ende vierdalf jmet heet die lettelmaet ende melis hofstede ende zesthalf line die heten keistringhe ende masins stic Ende sie halmedens hem te wetten van alden voerseiden lande ende sie weddent dien voerseiden jhanne ende vergrielen te wetten te waerne vri land ende quite land wech ende land met viertien sceleghen vlaemscher peneghe ende met hondert scouen glois elkes jaers te scouden te haren vrien eghindoeme Voert so camen voer ons die voerseide jhan cortscoef ende vergriele sijn zuster ende ghauen teruelicken chenze alt voerseide land dien voerseiden boudenen den wale ende margrieten sinen wiue omme tien pont ghoeder vlaemscher peneghe elx iaers te gheldene dene helt te sinte martins messe ende dandere helt te half meye daer na met enen ponde was te cope ende te versterfnessen ende die voerseide boudene ende margriete sijn wijf wordden daer voer ons wettelicke eruelicke chensers dier voerseidere jhans ende vergrielen omme die voerseide somme van peneghen tsiaers met alsuilken cope ende versterfnesse alst voerseit es Voert so wilcuerden die voerseide jhan cortscoef ende vergriele sijn zuster dien voerseiden Boudenen den wale ende margrieten sinen wiue of te losene ende te deliurerne alt voerseide land binnen drien jaren die naest coemen zullen omme hondert ende tvintich pont ghoeder vlaemscher peneghen jn diere maniere dat sie souden ghelden den chens van dien lande also alst came jn die tijd van den jare
</main>
<end>
Ende omme dat wie scepenen voerseit willen dat die voerseide sticke bliuen vast ende ghestade so hebben wie dese lettren ghezeghelt met onsen zeglen jn kennessen Dit was ghedaen jnt jaer ons heren als men screef sine jncarnatie tvelef hondert ende een ende tachtentich tsaterdaghes na sinte pieters daghe jnghanghende oeghest
</end>