Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_26

<begin>
diederic die vos thomaes die hont jan die brune weynin van varsenara bouden f boudens willem van cleyhem arnoud f heinemans ende jan van terrendyke wie scepenne vanden vrien doen te verstane allen den goenen die dese lettren sullen zien & horen lesen
</begin>
<main>
dat cam vor ons Clais f clais f tiesine ende heilewijf sin wijf f willems smeds & gaven wettelike ghifte den here gherarde van bredene capellaen van sinte saluators in brucghe ter Meentucht boef van sint saluators vorseit van tveen ymete lants ende eenvierendeel ymet lants lichtelic min jof me lecghende int ambocht & indie prochie van bredene of oestalf der kerke & heet doyts meed & coets belc & dat stic lants dat heet doyts meed leghet tusschen Masins f basekins wedewe lant ende gillis buys lant & dat ander stic dat heet coets belc leghet zuudover den herewech & nort [ove]r gherarts f gherarts kindre lant sie weddets dien vorseiden here gherarde ter meentucht boef van sinte saluators vorseit aldit vorseide lant te wette tewaerne wech & lant & quite lant met enen vlaemschen peneghe te sculden tsiaers aldit vorseide lant ter vorseider meentucht vrien eghindoeme jeghen elken meinsche
</main>
<end>
Ende omme dat wie vorseide schepenne willen dat dese dinc vast & ystade bliue So hebben wie dese lettren te kennessen hutanghende yseghelt met onsen zeghelle dit was ghedaen jn sinte Matheus hauende anno domini MCCLxxx primo
</end>