Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_27

<begin>
Boudene die broekre Jan die hamer rudders diedric die vos Oliuier f bouden noes thomaes die hond weinin van varsenare ende willem van cleihem wie scepen vanden vrien doen tewetene allen den goenen die dese lettren sullen sien jof horen lesen
</begin>
<main>
dat cam voer ons weitin scoelin ende ogieue sin wijf Ende gauen wetteleke ghifte Janne blancarde den clerc ter kerke boef van sinte marien Jn brucghe van tven ymete lands Ende zeuene ende dartich Roeden lands lichteleic meer jof min licghende binden ambochte ende binder prochie van dudsele benoerdhalf Riquaerds van riesele Ende hie weitin scoelin ende ogieue sin wijf wedden desen voerseiden Janne blancard al dit voerseide land tewette tewaerne ieghen elken mensche wech ende land ende quite land met alsulker scult alst ghelt te deser voerseider kerke van sinte marien vrien eghindoeme
</main>
<end>
Ende omme dat wie voerseide scepenen vanden vrien waren ouer dese ghifte ende dat wie willen datse vast bliue ende ghestade so hebben wie tekennessen dese lettren ghezeghelt met onsen zeghelen vthanghende dit was ghedaen sfrindaghes na sinte denys daghe anno domini m cc vierwaerventvintich ende een
</end>