Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_28

<begin>
Min here jan canin ruddre jan die brune hughe van boyenghem gherard die weuel arnoud filius heinemans oliuir filius boudens noes & jan van terrendyke wie schepenne vanden vrien doen te verstane allen den goenen die dese lettren sullen zien & horen lesen
</begin>
<main>
dat cam vor ons alard f aerlebouds poelards & gaf wettelike ghifte den here jacob den witten capellaen van sinte saluators ter meentucht boef vanden chore van sint saluators vorseit van vijf vierendeel ymete lants lichtelic min jof me van desen vorseiden landen legghen die drie vierendeel ymete lants int ambocht van ysendyke indie prochie sinte catelinen & heet langhe dyc & of nortalf leghet een ymene wech streckende te biervliet wart & of oestalf leghet willards filius heinrics lant & of westalf desen lande leghet arnouds filius jans lant & die vorseide ander tve vierendeel ymete lants lecghen int ambocht van oestburgh indie prochie sinte loys daer aerleboud dis alards vader vp woende & indie zelue ofstede & of sutalf desen lande leghet dis vorseits alards lant & of nortalf leghet hughe beyers kinder lant & of westalf leghet jans valken lant & of oestalf so leghet een ymene wech streckende ten zantweghe & ten hereweghe & hie weddets dien vorseiden here jacob ter vorseider meentucht boef van sinte saluators te wette te waerne wech & lant & quite lant ter meentucht boef vorseit vrien eghindoeme jeghen elken meinsche & die vorseide here jacob gaf weder vander meentucht haluen vorseit aldit vorseide lant desen vorseiden alarde te erfliken chense omme vichtiene sceleghe tsiaers goedere vlaemscher peneghe tegheldene desen chens telken sinte baues messe ende een pond pepers te cope & te versterfnesse
</main>
<end>
ende omme dat wie vorseide schepenne willen dat dese dinc vast & ystade bliue So hebben wie dese lettren te kennessen hutanghende yseghelt met onsen zeghellen dit was ghedaen saterdaghes na sinte denijs daghe anno domini M CC Lxxx primo
</end>